Inscríbite nel
nuesu boletín
Nós
ANTOXANA ye un proyectu que busca xenerar espacios d'alcuentru alredor de la cultura dirixíos a vecinos y visitantes.
Ta allugáu en Corao Castiellu (Cangas de Onís, Asturias), un núcleu rural de 21 vecinos a los pies de los Picos d'Europa.
El proyectu entama la so actividá pública en 2026 y ta impulsáu por Cañada de los Bojes, Sociedad de Beneficiu ya Interés Común, SL.
Programa
Gorka Postigo
Nunca conocerás a los mios nuevos amigos
20 Xun. → 13 Set. 2026
Miércoles a domingu
11:00 - 14:00 / 17:00 - 20:00
Seición Oficial
Esti proyectu naz a partir d'una esperiencia íntima de perda y tresformación y desendólcase como un percorríu visual que conecta dueldu, identidá y comunidá. Al traviés d'una serie de retratos realizaos en ciudaes como París, Londres, Río de Janeiro, Shanghái, Tokio y Abiyán, Gorka Postigo (Madrid, 1978) construye un mapa emocional onde les histories individuales dialoguen ente elles dende la vulnerabilidá, la resistencia y el deséu de conexón.
Lloñe d'una mirada documental tradicional, la esposición propón un espaciu d'alcuentru. Les imáxenes nun busquen definir identidaes, sinón abrir un llugar compartíu onde xestos, miraes y presencies xeneren nueves formes de relación. Nesti sentíu, el proyectu articúlase como una reflexón sobre la familia escoyida, la guapura queer y la posibilidá de reconstruyise fuera de los modelos heredaos. Tamién plantea una revisión crítica de les estructures de masculinidá, al tiempu que reivindica la fotografía como ferramienta pa crear comunidá.
Espaciu
ANTOXANA desendólcase na Casa de Cueto, una casona barroca del sieglu XVIII catalogada d'interés históricu-artísticu, allugada en Corao Castiellu, nel entornu de los Picos d'Europa.
La rehabilitación, llevada alantre por Xaime Diz y Susana Granizo del estudiu XDS arquitectos, rescata l'edificiu del so estáu de ruina p'adaptalu al so nuevu usu, contribuyendo asina a la puesta en valor del patrimoniu cultural d'Asturies.
La intervención, entamada en 2025, realizóse con criterios de conservación y sostenibilidá, incorporando meyores na envolvente y sistemes de climatización d'alta eficiencia empobinaos a amenorgar de manera significativa la demanda enerxética de la casa.
Al mesmu tiempu, priorizóse l'usu de materiales de proximidá, soluciones constructives de baxu impactu y el trabayu con artesanos y profesionales de la zona, convirtiéndola nun espaciu de consumu prácticamente nulu.
Proyectu cofinanciáu pola Unión Europea al traviés del Fondu Européu Agrícola de Desendolcu Rural (FEADER), el Ministeriu d'Agricultura, Pesca y Alimentación y el Principáu d'Asturies, nel marcu de la Midida LEADER M19.2 del Programa de Desendolcu Rural 2014-2020.
LEADER
Desendolcu lideráu poles comunidaes llocales
